Kisah Di Bulan Ramadhan 1413H...

Lee Man Tat rahat malunta di parit. Julak Haruk nang rahat babiskar tuha marawa sidin.
"Oh angahnya, banyak baulihi iwak sapat gaganal pulang," ujar Julak Haruk.
"Bulan puasa hudah parak, dipa ramai batampah ka aku gasan maulah iwak wadi. Basahur wan babukaan balauk wadi hanyar sadap ilat marasani nyaman rakungan managuk Lak ai," padah Lee Man Tat.
 "Umai saja handal Cina - Banjar nangini bisa haja maulah iwak wadi leh," ujar Julak Haruk di dalam hati.

>>>>>>>>>>>>>>>>>>>>>>>>>>>>>>>>>>>>>>

Di rumah Angah Ijab.
"Tuh, abahmu ilankah? Garaki ayuha makanan sahur," ujar Angah Bini.
"Abah magun guring uma ai. Tagal, abah ada bapadah tadi," padah Utuh Halui nang hanyar limbah batamuas.
"Panya pulang urang tuha ngini?" Angah Bini bamamai.
"Ujarnya, uzur!" Ujar Utuh Halui.
"Umai urang tuha ngini handak kana simbur awan banyu wadi nih!" Angah Bini kasarikan.

>>>>>>>>>>>>>>>>>>>>>>>>>>>>>>>>>>>>>>

Galuh Ropeah mambawa'i umanya, Makacil Inah ka pasar. Dipa taniring saurang panjual (lalaki) manjual iwak wadi.

"Uma, sahur isuk kita balauk iwak wadi sapat lah?" Ujar Galuh Ropeah.
"Nyaman tuh," ujar Makacil Inah. "Utuh, tukar wadi," padah Makacil Inah ka panjual wadi pulang.
"Errr... tukar makcik? Tak boleh tukar makcik, saya jual makcik beli," padah panjual wadi ngintu.

"Eh, maaf ya mak saya cakap Banjar. Maknanya, kami nak beli ikan wadi ni," padah Galuh Ropeah.

"Oh, cakap Banjar. Maaf la, saya orang Banjar tapi tak pandai cakap Banjar," padah panjual wadi.
"Ruginya, baik awak belajar dari sekarang masih belum terlambat lagi," Galuh Ropeah manasihati.
"Errr... baiklah," panjual wadi tatunduk supan sambil manjulungi iwak wadi sapat nang diinta.

>>>>>>>>>>>>>>>>>>>>>>>>>>>>>>>>>>>>>>

Lee Man Tat wan Utuh Jihing tulak baimbai ka bazar Ramadhan.
"Angah Atat, tiring garai hujung tuh napanya leh maka babaris urang manukar," padah Utuh Jihing. Ibu jarijinya manunjukakan arahnya.
"Hi'ih, maka bajurut urang. Ayuha kita tulak itihi," ujar Lee Man Tat. Dipa gin umpat jua babaris. Sampai haja giliran dipa Utuh Jihing gin batakun.
"Angahnya bajual banyu panya nih? Banyu katum luku? Maka bajurutan urang babaris handak manukar," takun Utuh Jihing ka panjual banyu.
"Banyu wadi es," padah panjual banyu. Takipik Utuh Jihing. Kacar liur Lee Man Tat mandangar.

>>>>>>>>>>>>>>>>>>>>>>>>>>>>>>>>>>>>>>

Pakacil Samad rahat manjurak buah niur tuha. Utuh Halui datang mamaraki.
Utuh Halui: Pakacil maulah panya?
Pakacil Samad: Jurak niur tuha!
Utuh Halui: Handak ulah panya?
Pakacil Samad: Inti wadai balungan hayam!
Utuh Halui: Wadai balungan hayam panya?
Pakacil Samad: Wadai Banjar pang!
Utuh Halui: Wadainya sadapkah?
Pakacil Samad: Tantu sadap!
Utuh Halui: Di Bazar Ramadhan banyak bajual?
Pakacil Samad: Banyak ai!
Utuh Halui: Pakacil lah maulahnya?
Pakacil Samad: Kada, biniku pang!
Utuh Halui: Bini anum atawa bini tuha?
Pakacil Samad: Hish, muyakkkkkk!!! (Pakacil Samad manyasah Utuh Halui sampai talurut tapihnya, tampaian salawar katok putih bahintalu kutuan)

>>>>>>>>>>>>>>>>>>>>>>>>>>>>>>>>>>>>>>

Lee Man Tat bapandir awan Angah Ijab nang baniaga di bazar Ramadhan.

"Jab, kao tahukah. Tangah ari tadi aku tulak sabigi kadai makan Cina di pakan ganal. Umai ai, ada jua nang kada puasaan tulak makanan intang situ," padah Lee Man Tat.
"Bergh, napa kadada panguat kuasakah tulak manangkapi dipa?" Takun Angah Ijab.
 "Mapa handak nangkapi, amun di tiring sabigi muha Cina!" Ujar Lee Man Tat.
 "Astagfirullahaladzim!" Angah Ijab mamusuti dadanya

>>>>>>>>>>>>>>>>>>>>>>>>>>>>>>>>>>>>>>

Angah Bini rahat bamasak gangan sasangan susupan di atang gasan basahur.

"Utuh, abahmu ilan guring dah?" Takun Angah Bini.
"Dah, ada tuh rahat tiring talibisin," padah Utuh Halui nang hanyar imbah batamuas.
"Umai, ari ngini kada digarak gin awal bangun. Panya tiringnya?," Takun Angah Bini lagi.
"Gimnastik babinian Sukan Olimpik 2012," padah Utuh Halui.
"Bapalak!" Kuciak Angah Bini garingitan.

>>>>>>>>>>>>>>>>>>>>>>>>>>>>>>>>>>>>>>

Angah Bini auran bamasak gasan basahuran.

"Utuh, garak abahmu!" Suruh Angah Bini. Utuh Halui hanyar imbah batamuas.
"Ok!" Utuh Halui gin tulak ka bilik abahnya. 30 minit dudi.
"Ish, mana pulang dua ikung nih?" Angah Bini garunuman. Angah Bini gin tulak maitihi.
"Bapala, sadapnya ai dua ikung nih guring baikupan!" Kuciak Angah Bini.

>>>>>>>>>>>>>>>>>>>>>>>>>>>>>>>>>>>>>

Angah Bini auran bamasak di padu gasan basahur.
"Utuh, garak abahmu tuh!" Kuciak Angah Bini ka Utuh Halui rahat batamuas.
"Abah dah ilan tadi umai ai," ujar Utuh Halui.
20 minit dudi. Angah Ijab magun kada sing cangulan. Angah Bini maitihi di ranjang, kadada. Sakalinya Utuh Halui bakuciak.
"Uma, nih abah di dalam jamban, badangkak taguring!" Padah Utuh Halui.
"Saja bapalak urang tuha ngini!" Mamai Angah Bini.

>>>>>>>>>>>>>>>>>>>>>>>>>>>>>>>>>>>>>>

Waktu basahuran.
"Abahnya, bangun hudah masuk basahur nih!" Ujar Angah Bini. Angah Ijab gin ilan guring.
"Kajut si utuh tuh," ujar Angah Bini lagi. Angah Ijab gin tulak ka bilik Utuh Halui.
15 minit dudi.
"Aish, hudah pukul barapa nih! Mana pulang dua ikung nih!" Angah Bini gagarunuman. Angah Bini gin tulak ka bilik Utuh Halui handak maitihi. Sakalinya, takipik Angah Bini.
"Saja bapalak!" Kuciak Angah Bini wayah maniring Angah Ijab guring mangaruh sambil diikup Utuh Halui di atas ranjang.

>>>>>>>>>>>>>>>>>>>>>>>>>>>>>>>>>>>>>>

Di rumah Angah Ijab. Parak jam dua patang, Angah Bini taniring Angah Ijab mambawa'i sapinggan nasi awan saikung iwak sapat barandang kaluwar matan lawang padu.

"Ish, laki aku ngini ka mana pulang handak bawa'i sapinggan nasi? Kada puasa jua kah? Kana indap nih!" Garunum Angah Bini.
Angah Bini gin umpat matan balakang gagamatan. Jantungnya badagup kancang handak maitihi. Sakalinya Angah Bini takipik.
"Cing, maras aku tiring kao. Nah makan lah nasi awan lauk ngini," ujar Angah Ijab sambil manjulungi sapinggan nasi ka saikung kucing marau nang rahat garing.

>>>>>>>>>>>>>>>>>>>>>>>>>>>>>>>>>>>>>>

Utuh Jihing wan Julak Haruk tulak ka Bazar Ramadhan.

"Sadap wadai kalakatar ngini. Bagi 10 himpil," ujar Utuh Jihing ka panjual wadai.
"Wadai balungan hayam ngini 16 buting lah," ujar Julak Haruk ka panjual wadai.
15 minit dudi.
"Umai banyaknya ai kao manukar makanan Lak! wadai, nasi hayam, banyu es, sate, hayam banam... panya lagi tuh?" Ujar Utuh Jihing.
"Gasan babuka asa sadap tiring. Alah, kao gin sama ai maka banyak!" Ujar Julak Haruk pulang.
Dipa gin handak bulikan tahaga saurang pangamis tuha babini awan anaknya. Kaadaan dipa mari maras, kamuringan banar.
"Syukur alhamdulillah nak ai awan nikmat Allah bagi'i sabuting ruti gasan kita babuka ari ngini," ujar pangamis tuha babini ka anaknya nang halui lagi.
Hati Utuh Jihing wan Julak Haruk asa maras, insap maniring.

>>>>>>>>>>>>>>>>>>>>>>>>>>>>>>>>>>>>>>

Di rumah Angah Ijab.
"Umanya, buluh lamang nang baandakan di barumahan ka mana hilangnya?" Takun Angah Ijab.
"Utuh Halui tadi maambil," padah Angah Bini rahat mamutik pucuk kaduk di higa rumah.
"Gasan maulah lamang kina. Panya pulang ulahnya?" Takun Angah Ijab lagi.
"Ujarnya tadi maulah mariam jah," padah Angah Bini.
"Saja bapalak!" Angah Ijab kasarikan.

>>>>>>>>>>>>>>>>>>>>>>>>>>>>>>>>>>>>>>

Utuh Halui rahat bamain mariam tem awan kakawanannya di buntut bandang.
"Utuh, kao pang nyucuhi," padah Ajib takutan.
"Ok!" Utuh Halui gin mamarakakan batang guris baapi di muhara lubang halui tem pangkal mariam. Jantung Ajib, Udin wan Usop asa badagup kancang mahadang kaipa ilun gancang latupannya.
"Tantu gancang nih ilun malatupnya!" Garunum Ajib di dalam hati.
PROOTTT!!!
"Umai, maka gancang ilunnya!" Kuciak Ajib.
"Bungul, kada latup lagi! Tadi aku... takantut!" Padah Utuh Halui. Kakawanannya takipik.

>>>>>>>>>>>>>>>>>>>>>>>>>>>>>>>>>>>>>>

"Tuh, napa mariam buluhmu ilun maka gancang ilah patir? Mariam bat kami ilah bakantut haja," takun kawanannya.

 "Rahsianya... kabatnya ngintu dibuati saikit banyu wadi pang!" Padah Utuh Halui. "KABOOMMM!!!" Bailun.

>>>>>>>>>>>>>>>>>>>>>>>>>>>>>>>>>>>>>>

Makacil Inah tahaga Siti Mariam di bazar Ramadhan.
Makacil Inah: Umai Mariam, banyak ai manukar wadai.
Siti Mariam: Kada banyak ai, baampat ikung haja urangnya di rumah.
Makacil Inah: Baimat babalanja, jangan umpah banar.
Siti Mariam: Bujur ai. Tagal, muyak banar aku wayahini Makacil ai!
Makacil Inah: Huh, napa pulang?
Siti Mariam: Kakanakan katuju mahiyau ngaranku!
Makacil Inah: Hah?
Siti Mariam: Mariam tem, mariam buluh, mariam palung banyu bandang, maram ngintu mariam ngini ujar dipa. Huh, muyak!
Takurihing Makacil Inah. Tampaian gigi amasnya sabuting.

>>>>>>>>>>>>>>>>>>>>>>>>>>>>>>>>>>>>>>

Utuh Halui mamaraki Pakacil Samad nang rahat bahinip di barumahan.

Utuh Halui: Pakacil puasakah ari ngini?
Pakacil Samad: Tantu puasa.
Utuh Halui: Ari ngini barapa Ramadhan?
Pakacil Samad: 17 Ramadhan.
Utuh Halui: Pakacil puasa panuh lah?
Pakacil Samad: Panuh ai. (Kada hakun kalah)
Utuh Halui: Barapa ari hudah puasanya?
Pakacil Samad: 15 ari!
Utuh Halui: Ooo, pacah dua ari leh? (Tatawa tarus mancicing bukah)
Pakacil Samad: Errkkk! (Supan)

>>>>>>>>>>>>>>>>>>>>>>>>>>>>>>>>>>>>>> 

Pakacil Samad tahaga Lee Man Tat (Cina - Banjar) di bazar Ramadhan.
"Atat, kao nandukah amun ada kakanakan anak yatim parak tampat kita? Aku handak basadakah saikit," ujar Pakacil Samad.
"Ada, rumahnya di subalah tabuk kita. Ayuha!" Ujar Lee Man Tat imbah batutukaran. Dipa gin tulakan. Sampai haja di rumahnya.
"Ading, Pakacil handak mambari'i sadakah duit saikit ngini. Ading anak yatim leh?" Takun Pakacil Samad ka kanak lalaki ngintu.
"Hi ih Pakacil ai," padah kanak lalaki ngintu.
"Kabila uma atawa abahmu maninggal? Lawas hudah?" Takun Pakacil lagi.
"Eh, hidup lagi ngah ai. Ngaran umaku Arbaeyah, abahku Yatim," kanak lalaki ngintu bapadah jujur.
"Atat, kao salah bagi info nih!" Mancileng mata Pakacil maniring Lee Man Tat. Mandam Lee Man Tat.

>>>>>>>>>>>>>>>>>>>>>>>>>>>>>>>>>>>>>>

Angah Ijab wan Angah Bini hanyar bulik manukar pakaian raya di pakan ganal. Di rumah.

Utuh Halui: Banyak tukar baju uma?
Angah Bini: Kada banyak, 10 pasang haja.
Utuh Halui: Umai, banyak tu ah!
Angah Ijab: Baju kurung sapasang haja, nang lain baju kutang! (Muha muyak)
Utuh Halui: Bergh!
Angah Bini: SALE RAYA!!! (Takurihing)

>>>>>>>>>>>>>>>>>>>>>>>>>>>>>>>>>>>>>>

Utuh Halui umpat Pakacil Samad tulak ka pakan ganal. Pakacil Samad handak manukar baju Fatihah hanyar gasan baari raya. Di kadai pakaian.

Panjual Baju: Nangini sapasang RM99.00, diskaun 15%.
Pakacil Samad: Ok, amun kaitu aku tukar pisen nangini ampat pasang lah. Warna hijau, habang, hirang wan 'pink'. Saiz XL.
Panjual Baju: Ok Pakacil!
Imbah bayar, di luar kadai.
Utuh Halui: Umai Pakacil sampai ampat pasang! Tulak barayaan ka mana?
Pakacil Samad: Hijau gasan bini tuha, habang bini no.2, hirang bini no.3 wan 'pink' bini anum. (Takurihing lanji)
Utuh Halui: Bergh saja handal! (Takipik)

>>>>>>>>>>>>>>>>>>>>>>>>>>>>>>>>>>>>>>

Di balakang rumah Angah Ijab. Pakacil Samad rahat manabang sabatang buluh.

Utuh Halui: Handak ulah panya buluh ngini Pakacil?
Pakacil Samad: Kukuar.
Utuh Halui: Handak ulah panya kukuar Pakacil?
Pakacil Samad: Jurak niur anum.
Utuh Halui: Handak ulah panya niur anum Pakacil?
Pakacil Samad: Wadai kalakatar.
Utuh Halui: Handak ulah panya wadai kalakatar Pakacil?
Pakacil Samad: Babuka puasa.
Utuh Halui: Handak ulah panya babuka puasa Pakacil?
Pakacil Samad: Kakanak ngini saja macal. Muyaknya ai! (Bamamai Pakacil Samad manyasah Utuh Halui bukah sambil tatawa ganal)

>>>>>>>>>>>>>>>>>>>>>>>>>>>>>>>>>>>>>>

Pakacil Samad rahat manunjul biskar tuhanya matan barumahan handak ka pakan ganal. Utuh Halui tulak mamaraki.

Utuh Halui: Pakacil handak ka mana?
Pakacil Samad: Maybank di pakan ganal pang.
Utuh Halui: Huh, ulah panya?
Pakacil Samad: Hurup duit karatas hanyar.
Utuh Halui: Yahoo! Gasan duit raya bat Utuh barapa Pakacil?
Pakacil Samad: Batmu kina Pakacil bari'i dua kupang haja.
Utuh Halui: Bergh, sipnya!
Pakacil Samad: Kakanak kada mayu umur, angry birds gin kada batatak gulu lagi kada hingkat baulih duit raya sing ganalan!
(Utuh Halui tarus bulik muha asa handak tatangis. Takurihing Pakacil Samad)

>>>>>>>>>>>>>>>>>>>>>>>>>>>>>>>>>>>>>>

Di Rumah Angah Ijab.

"Uma, raya kina Utuh handak jam tangan hanyar lah," sambat Utuh Halui.
"Hari ngini jua uma bagi'e\i Utuh ai. Nah jam tangan daun niur anum," padah Angah Bini. Marangut muha Utuh Halui.

 

Sumber cerita: Kulaan Banjar Kerian