Baturai Pantun

Pantun ini adalah pantun bersahut – sahutan atau berbalas pantun.Setelah istirahat melakukan menuai padi atau juga  kaum muda berkumpul – kumpul di rumah pengantin sebelum atau sesudah acara mempelai bersanding. Baturai pantun dilakukan secara sepasang atau berkelompok.

( Biasanya dimulakan oleh seseorang dari ketua acara)

Mamuai wanyi tangkainya runtun
Wanyi dipuai di atas gunung
Mari kita baturai pantun
Mahaur-haur hati nang bingung

I

Manutuk lasung balenggang
Mapa akal handak mangalangakan
Amun buruk tapih di pinggang
Siapa jua nang manggantiakan

II
Baras limbukut jangan ditumbuk
Baik ditampi buang dadaknya
Jangan takutan batapih buruk
Kena aku manggantiakannya

I

Limbukut asalnya baras

Hagan baulah cingkaruk batu

Mun ada nang marasa maras

Siapa jua manukarakan baju

II

Baras diayak dalam sarakai

Buang banihnya ka pipiringan

Langkar banar batapih bahalai

Sarasuk wan baju sasirangan

I

 Nyaman-nyamannya makan tiwadak

Kulit durian banyak durinya

Duduk basandar bahimpit awak

Sambil bapantun palipur lara

II

Tumit sandal sasain lisit

Banyak bajalan kunyuk-kunyuk

Mun basandar jangan bahimpit

Kada tahan ada nang mancucuk

I

Awak basandar batis bahunjur

Sambil mamakan sarikaya

Amun bapandir bujur – bujur

Jangan sambatan manyalaya

(A)

Mun mamatuk lakasi sisit

Iwaknya sapat saluang

Jangan pina sasirit-sirit

Mun handak batarus tarang

(B)

Sapat saluang di bawah batang

Di bawah batang takana jarat

Nang kaya apa batarus tarang

Amun muntung ngalih manyambat

(A)

Takana jarat tali paikat

Ganting di awak talulun-lulun

Mun ngalih muntung manyambat

Datang haja ka ruman ulun

(B)

Buah kastela barandak-randak

Masak sabigi dimakan musang

Babujuran marasa  handak

Tapi takutan ditimpas urang

(A)

Musang pandan makan tiwadak

Habis tiwadak lalu  kasturi

Amun bujur – bujur rasa handak

Biar lautan disubarangi

(B)

Makan tiwadak ambil mandainya

Mandai disanga di dalam rinjing

Hati sanang kada sakira

Mandangar ucapan si ading

(A)

Ayam putih tarbang ka jambu

Limbah ka jambu ka awan pulang

Kalu handak lawan badanku

Lakasi haja pian badatang

(B)

Pucuk waluh bacabang dua

Dilayapakan ka puhun jambu

Sudah judu kita badua

Ancap kita datang ka pangulu


Sumber: Arsyad Indradi